Morfologia

2. Su nùmene

Su nùmene serbit a inditare sa realidade, persones, cosas e logos.
Su nùmene podet tènnere duos gèneres, maschile e feminile.
A su sòlitu sos nùmenes maschiles finint in -u e sos feminiles in -a.
Sunt maschiles sos chi finint in -s e sos in -e podent èssere segundu su casu maschiles o feminiles.
Un'etzetzione de ammentare est agu, chi est feminile.

Nùmene	Gènere
chelu	maschile
cara	feminile
pane	maschile
lughe	feminile
carabineri	maschile
tempus	maschile

Su plurale de sos nùmenes in sardu si format agiunghende una -s.
In sos nùmenes chi finint in -u e -us custa vocale càmbiat a o.

Singulare	Plurale
chelu	chelos
cara	caras
pane	panes
lughe	lughes
carabineri	carabineris
tempus	tempos

In sardu esistit una forma particulare de plurale chi est su plurale colletivu.
Cando cherimus inditare una cantidade indefinida, riferida a animales piticos e frùtora o berdura usamus sa matessi forma de su singulare.
Pro nàrrere:

Oe apo mandigadu duas melas
però
Oe sa mela in sa butega est barata

Apo mortu tres tzìntzulas
però
Custu logu est prenu de tzìntzula