4. Su pronùmene

1. Personale

   Su pronùmene personale est cudda parte de sa frase chi si ponet in parte de su nùmene.
   Sos pronùmenes personales podent èssere sugetu o cumplementu. Sos pronùmenes sugetu sunt:

   I singulare	deo
   II singulare	tue
   III singulare	isse/u, issa
   I plurale	nois
   II plurale	bois
   III plurale	issos, issas

   Sos pronùmenes cumplementu sunt:

   	Formas àtonas	Formas tònicas
   I singulare	mi	a mie; de, pro,... me(ne); cun megus
   II singulare	ti	a tie; de, pro,... te(ne); cun tegus
   III singulare	li, lu, la, ddi, ddu, dda	a, de, pro, ... issu/issa
   I plurale	nos	a, de, pro, ...nois
   II plurale	bos	a, de, pro,... bois
   III plurale	lis, los, las, ddis, ddos, ddas	a, de, pro, ... issos/issas

   Pro nàrrere:
   A mie mi praghet cussa pitzinna
   Ti l'apo giai naradu
   Su casu lu màndigo a de note/Su casu ddu màndigo a de note
   A bi la regalas cudda borseta?/A si dda regalas cudda borseta?
   Nos praghent sos Cordas et Cannas. E a bois a bos praghent?
   Lis ant fatu sos pabassinos pro sos Mortos/Ddis ant fatu sos pabassinos pro sos Mortos
   Est bènnidu cun megus
   In sardu bi sunt puru duas partitzellas pronominales

   nde	pro sas cosas
   nche	pro sos logos

   Pro nàrrere:
   A nde cheres de binu?
   A ti nch'andas, nara?
   
   Bae·ti·nche
   Dae·mi·lu/Dae·mi·ddu
   Cando sos pronùmenes àtonos e sas partitzellas pronominales sunt proclìticos, est a nàrrere cando andant a in antis de su verbu, s'iscrient che a totu sas àteras paràulas. Cando imbetzes sunt enclìticos, est a nàrrere cando andant a pustis de su verbu, si iscrient che a una paràula sola ma partzidos dae unu puntigheddu.

2. Possessivos

   Sos pronùmenes possessivos inditant apartenèntzia o possessu e si usant in parte de su sustantivu.

   Singulare	Plurale
   meu/miu; mea/mia	meos/mios; meas/mias
   tuo/tua	tuos/tuas
   suo/sua	suos/suas
   nostru/nostra	nostros/nostras
   bostru/bostra	bostros/bostras
   issoro	issoro

3. Dimustrativos

   Sos pronùmene dimustrativos inditant sa positzione de persones o cosas.

   Singulare	Plurale
   custu/a	custos/custas
   cussu/a	cussu/cussa
   cuddu/a	cuddu/cudda

   Custu: a curtzu de chie faeddat e a largu de chie ascurtat
   Cussu: a largu de chie faeddat e a curtzu de chie ascurtat
   Cuddu: a largu de chie ascurtat e a largu de chie faeddat

4. Relativos

   Su relativu serbit a collegare intre issas duas frases.
   In sardu b'at una forma ebbia, chi est chi.
   
   Pro nàrrere:
   Su cadderi chi mi nch'at batidu su caddu mi nch'at batidu puru sa sedda.
   Su pitzocu chi apo saludadu est fradile meu.
   Su libru chi mi so ispiradu est S'ùrtima pàgina
   Sa pitzoca chi bi so essidu eris est de Terranoa.
   Su mere chi mi nche so fuidu non mi pagaiat sos istraordinàrios.
   S'amiga chi prus mi fido est de Orane.

5. Interrogativu

   Sos pronùmenes interrogativos si usant pro pregontare. Sunt:
   chie
   ite
   cale
   cantu
   Pro nàrrere:
   Chie est essidu?
   Ite cheres?
   Cale est?
   Cantu costat?

6. Indefinidu

   Si usant pro inditare a calicunu o carchi cosa in manera indeterminada.
   Unu, ognunu, nemos, calicunu, àtere, chie si siat, cale si siat, totu, nudda.